«مصدر فلوسك منين؟!».. رئيس تحرير الأهلي يرد على تصريحات شيكابالا النارية

رد إبراهيم المنيسي، رئيس تحرير مجلة الأهلي ومقدم برنامج «ملك وكتابة» عبر قناة النادي، على تصريحات محمود عبدالرازق شيكابالا، قائد الزمالك.

وكان شيكابالا قد أثار الجدل بتصريحات قوية، عبر بودكاست مع أحمد حسام ميدو، عضو لجنة التخطيط بنادي الزمالك، قال فيها بأنه يتم مساندة الأهلي عكس ما يحدث في القلعة البيضاء، الذي لا يزال يحارب للفوز بالبطولات.

وقال إبراهيم المنيسي عبر قناته على منصة «يوتيوب»: «أنا عايز أسأل مين بيعمل إيه للنادي الأهلي؟، الأهلي بيشتغل في نفس المناخ اللي الزمالك بيشتغل فيه، بل إن الزمالك بيلاقي دعم وقروض اللي الأهلي مش بيلاقيها».

وأضاف: «الزمالك بتتغير له حاجات كتير وبيمنح الرخصة حتى وهو مديون باعتراف مسؤوليه وبيتفتح له قيد في فترات أساسًا عليه فلوس كتيرة».

وأكمل: «فلو في حد يا شيكابالا بياخد دعم وتسهيلات فهو الزمالك، لا الأهلي ولا النادي التاني، هو بيتساعد عشان يعمل إيه فلوس يعني، فلوس الأهلي مصدرها ثابت معلن والميزانية موجودة».

وتابع: «ولما يقولك ما تساعدونا يا نقفل النادي ونلعب خماسي، مين خرجك من الكونفدرالية؟، معتقدش حد تدخل عشان يخرج من الكونفدرالية، وخسرت ماتشات في الدوري وقدمت نفسك لطبق من ذهب لبيراميدز، وبقيت بتسانده، التقصير والقصور عندك أنت».

وزاد: «الأهلي جاب صفقات بحُر ماله الفترة اللي فاتت بـ 6.9 مليون دولار، الزمالك دفع 6 ونص مليون دولار مستحقات. مين اللي هيقفل النادي ياعم شيكا».

وأردف: «أنا بالفلوس اللي اتوفرت لي جبت لاعيبة تقال وأنت بتدفع نفس الفلوس غرامات، هل الأهلي حد سانده؟ أنت الفلوس اللي اتدفعت دي جت منين، أتحدى حد يقول مصدر فلوس غرامات الزمالك منين؟ وأتحدى حد يقول مصدر الفلوس منين».